Maletg simbolic: maun femna scriva en agenda cun stilograf

Procedura

Introducziun ed inoltraziuns

La procedura da mediaziun vegn iniziada da la dumonda da mediaziun (art. 202 al. 1 CPC). Questa po vegnir protocollada a bucca u en scrit sin palpiri u vegnir inoltrada sin via electronica (cfr. art. 130 CPC). Sco model per la dumonda en scrit recumandain nus il formular dinamic da l'Uffizi federal da giustia che renviescha a las indicaziuns necessarias las pli impurtantas (vesair formulars).

Tractativa da mediaziun

L'autoritad da mediaziun trametta immediatamain la dumonda da mediaziun a la cuntrapartida e citescha il medem mument las partidas a la mediaziun (art. 202 al. 3 CPC). La tractativa vegn fatga en princip entaifer dus mais suenter che la dumonda è entrada (art. 203 CPC). L'interrupziun da las periodas da scadenza na vala betg (art. 145 al. 2 CPC).

Preschientscha persunala

Las partidas ston esser preschentas persunalmain a la tractativa da mediaziun (vesair per las excepziuns l'art. 204 al. 3 e 4 CPC). Ellas pon sa laschar accumpagnar d'ina assistenza giuridica u d'ina persuna da confidenza (p.ex. confamigliars u amis).

Negligientscha

En cas d'ina negligientscha da la partida accusanta vala la dumonda da mediaziun sco retratga; la procedura vegn stritgada pervia da mancanza d'object (art. 206 al. 1 CPC). En cas d'ina negligientscha da la partida accusada proceda l'autoritad da mediaziun sco sch'i n'avess dà nagina cunvegna (al. 2). En cas d'ina negligientscha da tuttas duas partidas vegn la procedura stritgada pervia da mancanza d'object (al. 3).

Conciliaziun e confidenzialitad da la procedura

L'autoritad da mediaziun emprova da conciliar las partidas en ina tractativa senza formalitads. Per princip na dastgan las deposiziuns da las partidas ni vegnir protocolladas ni vegnir duvradas pli tard en la procedura da decisiun (cf. dentant l'art. 205 al. 2 CPC). Quai pussibilitescha a las partidas da preschentar a moda averta e cumplessiva la chaussa en lita e satisfa al fatg che las partidas na sa laschan savens betg represchentar dad in'advocata u dad in advocat avant l'autoritad da mediaziun.

Terminaziun

La procedura da mediaziun po vegnir concludida suandantamain:

sa retrair cun resalva da recuperaziun
sa cunvegnir (enclegientscha, renconuschientscha dal plant u retratga dal plant senza cundiziuns, tut ha l'effect d'ina decisiun cun vigur legala [art. 208 CPC])
emetter la permissiun da plant en cas che las partidas na sa cunvegnan betg (art. 209 CPC)
acceptar la proposta da sentenzia (art. 211 al. 1 CPC)
emetter la permissiun da plant suenter avair refusà la proposta da sentenzia entaifer 20 dis (art. 211 al. 2 CPC)
prender ina decisiun en cas da dispitas cun ina valur en lita fin a CHF 2000.00, uschenavant che la partida accusanta porta in plant correspundent (art. 212 CPC)

Inoltraziun dal plant a la dretgira

Sche la permissiun da purtar plant è vegnida averta, permetta ella durant trais mais d'inoltrar il plant a la dretgira (art. 209 al. 3 CPC). En cas da dispitas che resultan tras la locaziun e tras la fittanza da localitads d'abitar e da fatschenta sco er tras la fittanza agricula importa il termin da purtar plant 30 dis (art. 209 al. 4 CPC). Tenor l'art. 145 al. 1 CPC vala en princip l'interrupziun da las periodas.