Infurmaziuns generalas

Avant ch’in plant possia vegnir purtà ad ina dretgira civila, sto vegnir fatg tenor procedura civila per regla ina procedura da mediaziun (artt. 197 ss. CPC).Responsablas per quella èn uschenumnadas autoritads da mediaziun. Lur presidentas/presidents vegnan numnads en il diever linguistic savens derschadras e derschaders da pasch u mediaturas e mediaturs (art. 3 LItCPC):

• Ufizzis da mediaziun (1 per regiun)
• Autoritads da mediaziun per dumondas da locaziun (1 per regiun)
• Autoritad chantunala da mediaziun per dumondas d'egualitad

La dretgira da cumpromiss tenor il dretg federal d’assicuranza sociala (DAS) giuditgescha dispitas, per las qualas il dretg federal d’assicuranza sociala preveda ina procedura correspundenta, tranter   assicuraders e furniturs da prestaziuns - e però en ils secturs da l’assicuranza da malsauns, da l’assicuranza d’accidents, da l’assicuranza d’invaliditad e da l’assicuranza militara. La procedura davant la dretgira da cumpromiss preceda ina procedura da mediaziun tar l’autoritad da mediaziun per dumondas d’assicuranza sociala, sch’ina instanza da mediaziun instituida tenor contract n’ha betg anc ademplì la funcziun. 

Empe da la via d’ina procedura giudiziala pon dispitas finalmain er vegnir regladas cun agid d’ina uschenumnada mediaziun. Tar la mediaziun sa tracti d’ina metoda da soluziun da conflicts paschaivla, renconuschida.