Autoritad da mediaziun per dumondas d’assicuranza sociala e dretgira da cumpromiss
La dretgira da cumpromiss DAS giuditgescha dispitas – per las qualas il dretg federal d’assicuranza sociala (LItPMC; DG 370.300) preveda ina procedura correspundenta – tranter assicuraders e furniturs da prestaziuns en ils secturs da l’assicuranza da malsauns (art. 89 LAMal), da l’assicuranza d’accidents (art. 57 LAA), da l’assicuranza d’invaliditad (art. 26 al. 4 e 27bis LAI) e da l’assicuranza militara (art. 27 LAM). La Dretgira superiura furma per las dispitas ina partiziun speziala. Questa consista d’in commember da la Dretgira superiura ch’ha la presidenza e da dus commembers, dals quals in represchenta l’assicuranza e l’auter il furnitur da prestaziuns. Quests dus commembers vegnan designads da las partidas da cas a cas (cfr. art. 4 LItPMC).
La procedura davant la dretgira da cumpromiss sto preceder ina procedura da mediaziun tar l’autoritad da mediaziun, sch’ina instanza da mediaziun instituida tenor contract n’ha betg anc ademplì la funcziun.
La remuneraziun da l’autoritad da mediaziun e la dretgira da cumpromiss è reglada en ina ordinaziun decretada da la Dretgira superiura. Ils custs da procedura da la procedura da mediaziun èn fixads en art. 11a LItPMC. A la procedura davant la partiziun cumpromissariala da la Dretgira superiura vegnan er applitgadas las disposiziuns che valan per la Dretgira superiura (Lescha davart la giurisdicziun administrativa (LGA) sco er Ordinaziun davart las taxas e las expensas en daner blut en proceduras da dretg public).
Post da mediaziun
Mediatura: lic. iur. Nicole Mengiardi, Cuira
Suppleanza: lic. iur. Chasper Vital, Cuira
Adressa dal post da mediaziun: Ottostrasse 4, 7000 Cuira
Dretgira da cumpromiss
Presidenta: Dr. iur. Ramona Pedretti, LL.M., Cuira
Suppleanza: lic. iur. Elisabeth von Salis, Maiavilla
Adressa da la dretgira da cumpromiss: Obere Plessurstrasse 1, 7000 Cuira