Tenor l'art. 4 da l'Ordinaziun davart la calculaziun da l'onurari da las advocatas e dals advocats (ordinaziun d'onurari, OCO; DG 310.250) ston las partidas inoltrar al cumenzament da la procedura ina cunvegna d'onurari cumpletta e suttascritta. Sch'els tralaschan quai, po l'instanza giuditganta desister da consultar il quint da l'advocata u da l'advocat, cura ch'ella fixescha l'indemnisaziun da partida.
Tenor la pratica vertenta è la Dretgira administrativa mintgamai sa basada, en cas ch'il quint da l'advocata u da l'advocat è vegnì consultà per fixar l'indemnnisaziun da partida malgrà la mancanza d'ina cunvegna d'onurari, sin las tariffas per ura fatgas valair en la nota da custs, uschenavant ch'ellas na surpassavan betg il rom fixà en l'art. 3 al. 1 OCO da CHF 210.00 fin e cun CHF 270.00.
Ils 5 da settember 2017 a Dretgira administrativa ha concludì la suandanta midada da la pratica per fixar las indemnisaziuns extragiudizialas (cf. era la sentenzia da la Dretgira administrativa R 17 64 dals 28 d'avust 2018 consid. 3.1 cun renviament a la sentenzia U 16 92 dals 25 d'october 2017 consid. 13.b; per la pratica da la Dretgira chantunala cf. tranter bleras la sentenzia ZK1 10 27 dals 17 da december 2010 consid. 4 e 7 sco era la pli recenta sentenzia ZK1 18 87 dals 30 d'avust 2018 consid. 2):
En cas ch'ina cunvegna d'onurari vegn inoltrada:
- sch'i vegn fatg valair en la nota da custs ina tariffa per ura da passa CHF 270.00, vegn quella scursanida sin CHF 270.00,
- sch'i vegn fatg valair en la nota da custs ina tariffa per ura fin e cun CHF 270.00, vegn la tariffa per ura surpigliada tenor la cunvegna d'onurari.
En cas ch'ina cunvegna d'onurari na vegn betg inoltrada:
- i vegn surpiglià la tariffa per ura fatga valair en la nota da custs, maximalmain dentant ina tariffa per ura da CHF 240.00.
Spesas pauschalas fatgas valair vegnan concedidas a basa dal temp impundì maximalmain en la dimensiun da 3% da l'onurari fixà.
Questa pratica vala a partir d'immediat, era per tut ils cas pendents.