Incumbensas

Dapi l'1. da schaner 2025 è la Dretgira da giustia en funcziun. Questa dretgira administrativa speziala sa numna "Justizgericht des Kantons Graubünden" / "Dretgira da giustia dal chantun Grischun" / "Tribunale della magistratura del Cantone dei Grigioni". Ella lavura en emprima lingia sco instanza da recurs ed examinescha tant decisiuns da la cumissiun da surveglianza davart las advocatas ed ils advocats sco er decisiuns dal dretg da surveglianza ierarchica pertutgant commembers da la Dretgira superiura. Ultra da quai examinescha ella decisiuns dal dretg da persunal da la Dretgira superiura che concernan commembers da la Dretgira superiura. En la procedura da plant giudizial administrativ decida la Dretgira da giustia plinavant sco unica instanza chantunala davart dumondas d’indemnisaziun or da la lescha da responsabladad dal stadi che vegnan motivadas cun il cumportament da la Dretgira superiura respectivamain da persunas che lavuran per la Dretgira superiura. Finalmain decida la Dretgira da giustia definitivamain davart conflicts da cumpetenza tranter ils organs da la giurisdicziun, per la schliaziun dils quals la lescha na prevesa nagin’autra regla.