Gremis
Dretgira collectiva
La dretgira collectiva sa cumpona da tut las derschadras superiuras e tut ils derschaders superiurs ordinaris. Ella sa raduna per regla mintga dus mais e vegn presidiada dal president da la dretgira respectivamain da la presidenta da la dretgira. Las incumbensas da la dretgira collectiva èn regladas en la Lescha davart l’organisaziun giudiziala: tranter auter elegia la dretgira collectiva ils commembers da la cumissiun administrativa.
Cumissiun administrativa
Sper la presidenta u il president da la Dretgira superiura e la vicepresidenta u il vicepresident cumpiglia la cumissiun administrativa maximalmain trais ulteriurs commembers da la dretgira. Las linguas chantunalas vegnan resguardadas commensuradamain. La cumissiun administrativa sa raduna mintga dus emnas. La cumissiun administrativa surpiglia tut las incumbensas da l’administraziun giudiziala che n’èn attribuidas a nagin auter organ. Tranter auter è ella responsabla per la surveglianza ierarchica interna da la dretgira e per la surveglianza da las dretgiras regiunalas, per la dretgira da mesiras repressivas chantunala, per l’autoritad da mediaziun per fatgs d’egualitad, per la cumissiun da notars, per la cumissiun da surveglianza da las advocatas e dals advocats, per l’autoritad da mediaziun per fatgs d’assicuranza sociala e per la cumissiun d’expropriaziun. Ultra da quai exercitescha ella la surveglianza suprema da las autoritads da mediaziun survegliadas da las dretgiras regiunalas. La cumissiun administrativa po furmar ina giunta, a la quala ella surdat alura l’execuziun da tschertas fatschentas.
Cumissiun administrativa engrondida
La cumissiun administrativa engrondida pissera per la circulaziun d’infurmaziuns regulara e la coordinaziun dals interess tranter la Dretgira superiura e las autoritads giudizialas che vegnan survegliadas da quella.
Presidi
La presidenta u il president maina la Dretgira superiura e la represchenta vers anora. Tranter auter presidiescha ella u el la dretgira collectiva e la cumissiun administrativa e prepara lur fatschentas. La presidenta respectivamain il president realisescha en pli las sentenzias dals organs directivs da las dretgiras. Substituida vegn la presidenta u il president en cas d’impediment da la vicepresidenta ubain il vicepresident.