Contact e lieu
Dretgira superiura dal chantun Grischun
Grabenstrasse 30
7001 Cuira
Telefon: 081 257 39 90
Uras d’avertura:
8.00 – 11.30
14.00 – 16.30
Infurmaziun per dumondas
I n’è betg permess d’inoltrar scrittiras giuridicas, dumondas ed autras novitads per posta electronica ordinara (e-mail), per fax e.u.v. Cun quels meds da communicaziun n’èsi betg pussaivel da cuntanscher acts processuals valaivels.
Correspundenza giuridica electronica - inoltraziuns segiras per e-mail
Dapi il 1. da schaner 2011 datti en proceduras, en las qualas vegnan utilisadas la PC, la LSC u la PP la pussaivladad da la communicaziun electronica da partidas e d’advocats cun dretgiras ed autras autoritads giudizialas (art. 130 PC, art. 110 PP, art. 33a LSC, art. 85 LSA e art. 7 PC sco er art. 357 PP). Las modalitads per la correspundenza giuridica electronica èn regladas en la OCE-PCPS.
Dapi il 1. da schaner 2025 pon vegnir inoltradas dumondas a la Dretgira superiura en proceduras, a las qualas la LGA è applitgabla, er a moda electronica. Per quai sto vegnir utilisada ina signatura electronica reglamentada tenor ZertES. Per las ulteriuras modalitads vala confurm al senn la OCE-PCPS en la versiun dal 1. da december 2019 (art. 38a LGA).
Per dumondas electronicas è vegnida installada ina chascha postala electronica tar la plattafurma da distribuziun renconuschida, utilisada da la Dretgira superiura (IncaMail, Die Schweizerische Post AG) e sulettamain quella dastga vegnir utilisada.
La Dretgira superiura n’è per entant betg obligada da respunder a moda electronica. Entant ch’i na resulta nagut auter da legislaziun e giurisdicziun, cumpiglia la correspundenza giuridica electronica en il chantun Grischun ad interim mo il retschaviment da dumondas, però nagina consegna da sentenzias, disposiziuns processualdirectivas, citaziuns e.u.v. tras dretgiras ed autoritads.
Infurmaziuns
Davart proceduras vegnan concedidas infurmaziuns mo a las partidas, lur represchentants ed autras persunas participadas a la procedura legitimadas. La Dretgira superiura na cusseglia betg al telefon en dumondas da dretg, ed ella na dat naginas recumandaziuns davart la tscherna d’advocat.