Organisaziun
La Dretgira superiura consista per la perioda d’uffizi currenta (2025-2028) da 14 derschadras e derschaders. Ella occupa en pli actuaras ed actuars. La chanzlia da la dretgira guarda da las chaussas administrativas.
Surveglianza da la Dretgira superiura
La Dretgira superiura suttastat a la surveglianza suprema dal Grond cussegl (parlament chantunal). Ella al sto rapportar mintg’onn da si’atgna activitad commerziala e da quella da las instanzas inferiuras (rapport da gestiun). Dal rest administrescha la Dretgira superiura sasezza.
Giurisdicziun
La Dretgira superiura è dividida tenor l’Ordinaziun davart l’organisaziun e la gestiun da la Dretgira superiura (OOG) en quatter partiziuns. Quai èn:
- la partiziun da dretg constituziunal ed administrativ
- la partiziun da dretg d’assicuranza sociala e da la dretgira da cumpromiss
- la partiziun da dretg civil
- la partiziun da dretg penal
Las singulas partiziuns èn puspè divididas en chombras. Da mintga chombra fan part almain ina presidenta ed in president, ina substituta respectivamain in substitut ed ina derschadra supplementara u in derschader supplementar:
La partiziun da dretg constituziunal ed administrativ consista da l’emprima chombra da dretg constituziunal ed administrativ, la segunda chombra da dretg administrativ e la terza chombra da dretg administrativ.
La partiziun da dretg d’assicuranza sociala e da la dretgira da cumpromiss è dividida en l’emprima chombra da dretg d’assicuranza sociala, la segunda chombra d’assicuranza sociala e la dretgira da cumpromiss en chaussas da dretg d’assicuranza sociala.
La partiziun da dretg civil sa cumpona da l’emprima chombra da dretg civil, la segunda chombra da dretg civil e la chombra da scussiun e da concurs.
La partiziun penala finalmain è dividida en l’emprima chombra penala e la segunda chombra penala..
Ils derschaders
Il champ d’incumbensas da las 14 derschadras superiuras e derschaders superiurs cumpiglia tranter auter la direcziun d’ina procedura giudiziala, la collavuraziun en cas da sentenzias collegialas e la cumpetenza da decisiun sco derschadra singula respectivamain derschader singul.
Actuariat
Las actuaras ed ils actuars sa participeschan sco ulteriuras persunas giudizialas cun vusch consultativa a las sesidas da las chombras. Els scrivan sin basa dal resultat da la deliberaziun da la sentenzia u tenor directiva da la derschadra singula e dal derschader singul las sentenzias. Tut tenor basegn vegnan engaschadas ulteriuras actuaras ed actuars ad hoc.
Praticantas giuridicas e praticants giuridics
La Dretgira superiura engascha regularmain praticantas giuridicas u praticants giuridics. Per regla survegnan mintg’onn quatter giuristas e giurists la pussaivladad d’absolver in praticum durant l’entir onn per acquistar la patenta d’advocat.
Administraziun giudiziala
L’administraziun giudiziala cumpiglia ils gremis dretgira collectiva, cumissiun administrativa (cun la giunta da la cumissiun administrativa) e la cumissiun administrativa engrondida.
Servetschs centrals
Secretariat general
La secretaria generala u il secretari general maina e surveglia – sco post da stab da la Dretgira superiura – ils servetschs centrals: surtut la chanzlia da la dretgira, las finanzas e la contabilitad sco er l’informatica. Ultra da quai participescha la secretaria generala u il secretari general cun vusch consultativa als gremis da l’administraziun giudiziala.
Chanzlia
La chanzlia da la dretgira fa las lavur administrativas tenor la directiva da la dretgira.
Informatica
L’informatica dirigida da la responsabla IT u dal responsabel IT garantescha ensemen cun l’Uffizi chantunal d’informatica la funcziun da l’informatica da tut las autoritads giudizialas.
Persuna dal fatg per las finanzas
La persuna dal fatg per las finanzas tgira tranter auter las finanzas da la Dretgira superiura e fa en collavuraziun cun la secretaria generala u il secretari general e l’administraziun da finanzas il preventiv ed il quint annual da la Dretgira superiura per mauns da la dretgira collectiva e dal Grond cussegl.
Post d’infurmaziun
Il post d’infurmaziun infurmescha da fatgs da la Dretgira superiura, da las dretgiras regiunalas e da las autoritads da mediaziun.