Wappen Graubünden

Justiz Graubünden

Giustia dal Grischun

Giustizia dei Grigioni

Maletg simbolic: egliers sin tastatura e broschuras

Infuormaziuns

Mediaziun oblicatorica

Avant cha las bleras questiuns da dret civil rivan pro’l Tribunal, stöglian ellas passar üna procedura da mediaziun davant

  • l’uffizi da mediaziun
  • l’autorità da mediaziun per dumondas da locaziun
  • l’autorità da mediaziun per dumondas d’egualità pro questiuns davo ledscha d’egualità dal dret federal

 

Detagls suot:

» Autoritas da mediaziun

» Cudesch da procedura civila svizzer (CPC)

» Ledscha introductiva al cudesch da procedura civila svizzer (LltCPC)

Giurisdicziun gratuita (GGrat)

Tenor art. 117 CPC ha üna persuna il dret da survgnir la giurisdicziun gratuita, scha:

a. ella nun ha ils mezs finanzials necessaris; e

b. sia pretaisa giuridica nu para dad esser invana.

 

La giurisdicziun gratuita cumpiglia tenor art. 118 CPC:

a. la liberaziun da la prestaziun da pajamaints antecipads e da sgürezzas;

b. la liberaziun dals cuosts da drettüra,

c. la nominaziun güdiciala d'ün'assistenza giuridica, scha quai es necessari per defender ils drets, specialmaing scha la cuntrapartida es rapreschentada tras üna advocata o ün advocat; l'assistenza giuridica po gnir nomnada fingià per la preparaziun dal process.

 

2 La giurisdicziun gratuita po gnir concedida per part o tuottafat.

 

3 Na cuvrida da la giurisdicziun gratuita es il pajamaint d'indemnisaziuns da partida a la cuntrapartida.

 

Ulteriuras infuormaziuns a reguard giurisdicziun gratuita chattais Vus sülla pagina-web dal Tribunal chantunal.

Advocatas ed advocats

I nun exista ingüna obligaziun da tour üna advocata o ün advocat. Mincha persuna po in princip defender svessa sia chosa davant il Tribunal. Da tschella vart sun las persunas chi tscherchan dret libras d'ingaschar üna rapreschantanza tenor aigna tscherna.

 

Il Tribunal regiunal nu da ingünas cussagliaziuns giuridicas al telefon e nu fa ingünas racumandaziuns per la tscherna d’üna advocata o d’ün advocat.

 

Ulteriuras infuormaziuns a reguard advocatas ed advocats chattais Vus suot: fögl d'infuormaziun advocatas ed advocats

Cuntaisas da dret da lavur

Il Tribunal districtual es respunsabel per numerusas cuntaisas da dret da lavur privat. I‘l chantun Grischun nun exista – oter co in oters chantuns – ingün agen Tribunal da lavur. La procedura es per regla d’introdüer tras annunzcha da’l plont pro’l intermediatur respunsabel. Quel executescha la procedura da mediaziun (verer eir suot „Mediaziun obligatorica“).

Procedura d'avertüra da dret

Ün titel d’avertüra da dret es – per regla – ün documaint, cun qual po in üna procedura da scussiun gnir allontanà ün‘opposiziun. Id es da disferenzchar tanter il titel definitiv ed il titel provisoric d’avertüra da dret.

 

Il titel definitiv d’avertüra da dret il plü important es la sentenza executabla in sen da l’art. 80 LSC. Da listessa posiziun sun conguals güdiciaris e recugnuschentschas da debit güdiciarias; decrets e decisiuns d’autoritads administrativas da la confederaziun sün pajamaints o prestaziuns da sgürezza, decisiuns d’autoritads administrativas dal chantun sur d‘oblicaziuns dal dret public.

 

Daspö 2011 sun eir uschedit executables documaints publics in sen da l’art. 347 CPC titels definitivs d’avertüra da dret.

 

Il titel d’avertüra da dret provisoric es ün documaint da recugnuschentscha da debit, chi cuntegna üna decleranza da voluntà, ingio cha’l debitur s’oblia, da pajar ün import fix o leiv da definir infra ün temp determinà. Our da motivs pratics vegnan in dumonda be recugnuschentschas da debit in scrit. Recugnuschentschas da debits privats sco char-tas o contrats valan be sco titel d’avertüra da dret, schi cuntegnan la suottascripziun dal debitur o da seis rapreschantant.

 

Minimum d’existenza tenor l’art. 93 LSC

Tenor ledscha federala da scussiun e concuors (LSC) stipulescha il funcziunari da scussiun tenor seis parair, che entradas chi nu sun absolutamaing necessari pel debitur e sia famiglia e cun quai las talas pon gnir sequestradas.

» Ledscha federala da scuissiun e concuors (LSC) (per tudais-ch o talian)

 

Il Tribunal chantunal ha decretà in üna circulara las directivas per calcular il minimum d’existenza.

» Circulara dals 18 avuost 2009 (per tudais-ch o talian)

Dret ereditari

Avertüra dal testamaint / contrat da ierta

As chatta pro la mort dal testader üna disposiziun testamentara (ed/o contrat da ierta), es quella tenor art. 556 CCS da consegnar immediatamaing al Tribunal, e quai eir schi’s es da l’avis cha quella es invalabla. Minchün chi ha tut in deposit o chatta üna disposiziun tanter la roba da’l testader, es persunalmaing respuonsabel dad accumplir seis oblig, apaina ch’el ha tut cugnuschentscha da la mort dal testader.

Attest d‘eredità

Tenor art. 567 al. 1 CCS importa il termin per refüsar la ierta 3 mais. Quist temp cumainza pels iertavels legals, fintant ch’els nu pon cumprovar d‘avair tschüff plü tard cugnuoschentscha da la ierta, da quel mumaint, ch’els sun gnüts a savair da la mort dal testader, e pels iertavels instituits, da quel mumaint ch'els han survgni la commumicaziun ufficiala da la disposiziun cha'l testader a fat a lur favur.

 

In consideraziun da quistas disposiziuns legalas, rendaina attent als iertavels, cha l’attest d’eredità po pür gnir mis oura davo la scadenza dal termin da 3 mais daspö la cugnuoschentscha da la mort, resp. da la disposiziun testamentara. Per scurznir il termin, han ils iertavels la pussiblità da confermar al Tribunal, ch’els desistan sül dret da refüsar la ierta dal testader.


» Dumonda per ün attest d'eredità (per tudais-ch)

» Formular per l'acceptaziun da la ierta (per tudais-ch)

Cumprovas preventivas

Tenor art. 158 al. 1 CPC examinescha il Tribunal da tuot temp las cumprovas, scha:

- la ledscha conceda ün dret correspundent;

- la partida petenta fa valair vardaivlamaing cha las cumprovas sun periclitadas o chi da ün interesse degn da gnir proted.

 

Dimena sto esser preschaint üna periclitaziun da las cumprovas, voul dir il privel sto esser qua, cha cumprovas giajan a perder, p.ex. tras destrucziun, allontanamaint, donnagiamaint, müdamaint (p.ex. tras lavurs da construcziun sur o suot terra, lavurs da chavar, transports da material, tagl da laina, vandalissem etc.).

 

Ulteriuras infuormaziuns:

» Fögl d'infuormaziun a reguard cumprovas preventivas (per tudais-ch)

Scumond güdicial

Chi chi ha drets reals sün üna parcella, po far üna dumonda pro’l Tribunal, cha mincha disturbi da possess es d’interlaschar e cha surpassamaints vegnan sün pretaisa chastiats cun üna multa da fin fr. 2‘000.00. Il scumond po esser limità o illimità (art. 258 al. 1 CPC).

 

» Dumonda per ün scumond güdicial (per tudais-ch)

Ensi