Correspundenza giuridica electronica
Oz pon ins strusch pli imaginar ina vita moderna senza e-mails. Ils e-mails usitads pon però chaschunar divers problems. Questas difficultads cumpiglian tranter auter la mancanza da la suttascripziun d'agen maun, il ristg d'in midament da l'e-mail tranter il speditur ed il destinatur u l'invista da l'e-mail durant la transmissiun nuncodada. Pervi da quest motiv pretenda il legislatur per la communicaziun via e-mail tranter la dretgira e las partidas premissas particularas per la correspundenza giuridica electronica en il rom d'ina procedura civila e penala (art. 130 al. 1 CPC ed art. 110 al. 2 CPP).
- Inoltraziuns a la dretgira ston succeder en il format PDF.
- Las inoltraziuns ston vegnir signadas electronicamain cun in certificat qualifitgà; per quai pon ins tranter auter utilisar ina SuisseID. La Confederaziun metta a disposiziun ina software gratuita per signaturas.
- Las inoltraziuns a la dretgira ston succeder sur ina plattafurma da consegna electronica renconuschida, sco IncaMail u PrivaSphere.
Per persunas ch'èn registradas sin ina plattafurma da consegna renconuschida èn las adressas da las dretgiras regiunalas visiblas sin la plattafurma correspundenta dals registers da participants eGOV.