Incumbensas da la cumissiun da notariat

La cumissiun da notariat ha las suandantas incumbensas tenor art. 5 e 6 da la lescha davart il notariat dals 18. d'october 2004 (DG 210.300) :

Art. 5

1 La cumissiun da notariat è l'autoritad da surveglianza da tut ils fatgs da notariat.

2 Ella ha cunzunt l'incumbensa da:

a) exequir ils examens, conceder l'attest da qualificaziun e da saramentar las notaras patentadas ed ils notars patentads;

b) ordinar inspecziuns;

c) liberar dal secret professiunal;

d) decider en dumondas d'incumpatibilitad e da recusaziun;

e) tractar recurs cunter las disposiziuns da taxas da las persunas da notariat;

f) tractar accusaziuns e recurs cunter las persunas da notariat;

g) avrir e realisar inquisiziuns disciplinaras sco er ordinar mesiras disciplinaras;

h) communitgar recumandaziuns e dar scleriments davart fatgs dal dretg notarial ch'èn d'impurtanza generala.

3 La cumissiun da notariat rapporta annualmain al cussegl grond.

Art. 6

1 La cumissiun da notariat fixescha ina u pliras inspecturas u in u plirs inspecturs da notariat ed ordinescha inspecziuns periodicas da l'administraziun da l'uffizi da las persunas da notariat.

2 L'administraziun da l'uffizi da las administraturas e dals administraturs dal register funsil vegn inspectada per regla da l'inspecturat chantunal dal register funsil.

3 Las persunas da notariat èn obligadas d'infurmar la persuna d'inspecziun davart tut ils fatgs da lur administraziun da l'uffizi e da preschentar tut ils documents giavischads.

4 Las persunas d'inspecziun rapportan a la cumissiun da notariat.