Wappen Graubünden

Justiz Graubünden

Giustia dal Grischun

Giustizia dei Grigioni

Maletg simbolic: tavla da porta "Dretgira chantunala"

Collegis giuditgants

La Dretgira chantunala è dividida en collegis giuditgants ed organisatorics. Lur cumpetenzas sa drizzan tenor la natira dals cas dispitaivels e da las incumbensas organisatoricas.

Dretgira cumplessiva (GEG)

Il collegi da tut las 6 derschadras e derschaders è l'autoritad administrativa suprema da la dretgira. Cun resalva da las cumpetenzas dal Cussegl Grond sco autoritad electorala sa constituescha la Dretgira cumplessiva sezza e nominescha – per mintga perioda d'uffizi – las parsuras ed ils parsuras da las chombras, lur substitutas e lur substituts sco er las ulteriuras commembras ed ils ulteriurs commembers da las singulas chombras. Ella ha d'engaschar e da relaschar il persunal en plazza fixa, da relaschar ordinaziuns giudizialas, da deliberar il preventiv, il quint ed il rapport annual per mauns dal Cussegl Grond sco er da decider davart autras dumondas impurtantas da l'atgna administraziun giudiziala. En la surveglianza giudiziala èsi ultra da quai resalvà a la Dretgira cumplessiva da prender las mesiras disciplinaras pli rigurusas cunter dretgiras pli bassas e cunter persunas giudizialas.

Las chombras

La divisiun da la dretgira en chombras ch'è vegnida fatga per il 1. da schaner 2009 s'orientescha tenor ils champs giuridics principals: surveglianza da la giustia, dretg civil, execuziun sfurzada e dretg penal (cfr. ils artt. 5 ss. ODC). Las 6 chombras decidan per regla en gremis da 3 derschadras e derschaders. Davart chaussas dispitaivlas d'ina impurtanza fundamentala u sin ordinaziun da la parsura u dal parsura da la chombra decidan ellas en gremis da 5 derschadras e derschaders.

Sch'in med legal è evidentamain inadmissibel ubain evidentamain motivà u nunmotivà, decida la parsura u il parsura da la chombra responsabla en cumpetenza da derschadra singula u da derschader singul (art. 18 al. 3 LOG). La medema regla vala sche l'interess giuridicamain relevant vi da la decisiun scada durant la procedura spezialmain pervia da retratga, pervia da renconuschientscha u pervia d'enclegientscha (art. 9 al. 2 LOG).

Cumpetenza da derschadra singula u da derschader singul

Tenor l'art. 6 al. 2 e l'art. 7 LItCPC èn las parsuras ed ils parsuras da las duas chombras civilas e da la chombra da scussiun e da concurs cumpetents sco derschadra singula u sco derschader singul per:

  • la protecziun giuridica en cas clers da dispitas, nua ch'il dretg federal prevesa in'unica instanza chantunala (art. 5 CPC),
  • chaussas da la dretgira da cumpromiss, cun excepziun dal giudicament da recurs e da dumondas da revisiun,
  • cas, nua che la valur en dispita na surpassa betg CHF 5000.00,
  • cas, nua ch'il med legal è evidentamain inadmissibel u è evidentamain motivà u nunmotivà.

Tenor l'art. 395 CPP tracta la parsura u il parsura da la II. Chombra penala recurs sco derschadra singula u sco derschader singul, sch'ils recurs cuntegnan exclusivamain surpassaments u sch'els pertutgan las consequenzas accessoricas economicas d'ina decisiun en cas d'in import dispitaivel da maximalmain CHF 5000.00.

Ensi