Wappen Graubünden

Justiz Graubünden

Giustia dal Grischun

Giustizia dei Grigioni

Maletg simbolic: egliers sin ordinatur avert

Custs in proceduras civilas

Tenor l'art. 95 cpv. 1 CPC sa cumponan ils custs da process dals custs da dretgira e da l'indemnisaziun da partida.

Custs da dretgira

Tar ils custs da dretgira tutgan:

  • las pauschalas per la procedura da mediaziun;
  • las pauschalas per la decisiun (taxa da decisiun);
  • ils custs per la retschertga da las cumprovas;
  • ils custs per la translaziun; e
  • ils custs per la represchentanza da l'uffant tenor ils artt. 299 e 300 CPC.

 

En l'OTDPC ha la Dretgira chantunala dal Grischun fixà las pauschalas correspundentas.

 

La dretgira po pretender da la partida accusanta in pajament anticipà fin a l'autezza dals custs da dretgira presumtivs. Ella fixescha in termin per far il pajament. Sch'il pajament anticipà na vegn er betg prestà entaifer in termin prolungà, n'entra la dretgira betg en il plant u en la dumonda.

Indemnisaziun da partida

Sco indemnisaziun da partida vala:

  • l'indemnisaziun da las expensas necessarias;
  • ils custs d'ina represchentanza professiunala (per regla advocata u advocat); e
  • en cas motivads: ina indemnisaziun adequata per malcumadaivladads, sch'ina partida n'ha betg gì ina represchentanza professiunala.

 

Quai èn en emprima lingia ils custs per la represchentanza legala che sa cumponan da l'onurari da l'advocata u da l'advocat sco er da las expensas en daner blut per ils custs da viadi, per taxas postalas, per servetschs da telecommunicaziun, per copias e per chaussas sumegliantas. Cuntrari ad auters chantuns n'enconuscha il Grischun betg ina tariffa chantunala per advocatas e per advocats.

Repartiziun dals custs

Ils custs da process totals vegnan fixads d'uffizi e da princip en la decisiun finala. Els vegnan adossads a la partida perdenta. En cas che la dretgira n'entra betg en il plant u en cas d'ina retratga dal plant vala la partida accusanta sco partida perdenta. Sch'il plant vegn renconuschì, percunter la partida accusada. Sche ni l'ina ni l'autra partida n'ha gudagnà cumplettamain, vegnan ils custs da process repartids proporziunalmain tenor il resultat da la procedura. Custs da process nunnecessaris sto quel pajar che als ha chaschunà, e quai independentamain dal resultat da la procedura.

Regulaziun speziala da custs

En la procedura da mediaziun na vegnan concedidas naginas indemnisaziuns da partidas. Per tscherts tips da dispitas na resultan nagins custs da dretgira. Resalvada resta mintgamai l'imposiziun dals custs da dretgira en cas da process fatgs en mala fai u aposta.

Ensi